Ado 5 jinih panyakik di dunie nan panuah intrik

Ado 5 jinih panyakik
di dunie nan panuah intrik

PARTAMO panyakik DANGKI jo LICIK
Talunjuak luruih kalingkiang bakaik
Urang sanang,inyo nan bingik
Ayam batalua ikuanyo nan sakik
Kapalo gadang utak kicik
Dado bidang hati sampik
Kato nak mudo lagunyo tengik
Suko mambuek mari angik

KA DUO panyakik KAJAI BALAPIK
Hari hujan payuangnyo kapik
Jalan buruak kureta nyo irik
Mambali gabelo makan nak ajik

Dunie di kacak saku saku ba jaik
Ingin bagawua tapi sampilik
Karajo maleh makan sasumpik
Muncuang cipeh uruak saringik

KATIGO panyakik FASIK jo SYIRIK
Ndak picayo ka Sang Khaliq
Suko bana magic jo mistik
Kawannyo syetan jo palasik

Dakek kalapau jauah musajik
Jauah kasurau dakek discotik
Maleh mangaji suko jo musik
Kawan pareman musuah jo katik

KAAMPEK panyakik MANTIKO CIRIK
Suko mancari ilik-ilik
Nan busuak nyo kapik-kapik
Baa nak banci urang sabalik

Kadang bantuak anjiang tasapik
Di lapehankan urang nyo gigik
Di dulukan urang nyo irik
Di bulakang urang nyo tuncik

Lah nyato nan salah mancik
Lumbuang nan nyo arik
Berangnyo ka pipik
Padi nan nyo sabik

Mabuak manyapik jo malilik
Ma ambiek kesempatan di nan rumik
Dima tampek nan sampik
Disitunyo manyalingkik

KA LIMO panyakik POLITIK
Iko nan paling jijik
Labiah busuak dari cirik
Labiah buruak dari gacik

Kasalahan urang nyo ungkik-ungkik
Kasalahan diri ba himpik-himpik
Salah urang sagadang rangik
Ba angkek sampai kalangik

Nan limo kolah jenis panyakik
Nan ubeknyo sabanak sulik
Dukun pusiang dokter pun rumik
Ndak bisa dihituang jo matematik

Bukan turunan atau genetik
Bukan panyakik buatan pabirik
Tapi ulah salah didik
Hilang sopan jauah taratik

Ikolah kini panyakik publik
Panuah trik jo taktik
Sarek jo intrik-intrik
Sabana licin sabana licik

Ubeknyo mungkin ka musajik
Acok bazikie jo wirik
Mambaco do,a sarato ratik
Sabalun badan jadi mayik.....

Nahuzubillahhiminzalik.....

#copas dari mnovizon SKSB